Vuilwasgoed – Skoon lagwekkend | Bioskoop

Vuilwasgoed

Skoon lagwekkend
Film

Film

Info

Teks: Bennie Fourie

Regie: Morné du Toit

Met: Bouwer Bosch, Bennie Fourie, Nico Panagio, Tim Theron, Stiaan Smith, Charles Bouguenon, Simoné Nortmann en Leandie du Randt Bosch

Lengte: 100 min

Ouderdomsbeperking: 16LV

thefilmfactory.co.za

Gerhard Ehlers

Gerhard Ehlers

Artikel Skrywer

Gerhard Ehlers is ‘n passievolle filmmaker, en het al sedert sy skoolgaan jare die draaiboeke en regie van drie onafhanklike kortfilms behartig. Hy het sy B-Tech graad in Film en Televisie Produksie aan die Tswhane Universiteit van Tegnologie behaal waarna hy op ‘n verskeidenheid televisie en filmproduksies gewerk het as teksskrywer, assisitent regisseur en redigeerder.

 Lees Meer

“Dankie dat julle hier was.”

Met die lees van Vuilwasgoed se loklyn kan ’n mens nie help om te lag nie. Enige film met hierdie skerp sin vir humor is genoeg om selfs die suurste en meer ernstige gehore ’n paar tande te wys.

By die 2014 Silwerskermfees is die (toe) nuweling draaiboekskrywers, Bennie Fourie en Bouwer Bosch, met die gesogte prys vir Beste Kortfilm bekroon.Vuilwasgoed (die kortfilm) het almal onverwags betrap en gehore laat bulder van die lag. Dit het ’n goeie drie jaar geverg vir die konsep om sy pad van kortfilm na vollengte prent oop te baan. Uiteindelik is die wag verby.

Die storie volg min of meer dieselfde storielyn as in die kortfilm. Wim (Bouwer Bosch) en Kevin (Bennie Fourie) werk by “Die Borrel”, ’n sukkelende klerewassery wat hulle net as ’n tydelik besigheidsbedryf sien, totdat hulle groot droom om eendag hulle eie koffiewinkel oop te maak ’n werklikheid word. Hulle leen hulle kliënte se klere om snags na partytjies te gaan en maak dan seker dis weer skoon en gereed wanneer dit die volgende oggend afgehaal word. Wim en Kevin wat as jarelange pêlle steeds onder dieselfde dak woon en tipiese bleeksiel- belangstellings deel, help glad nie om potensiële meisies te lok nie… veral as jy in gedagte hou dat hulle al die 30-merk geslaan het.

Dan gebeur daar iets wat die twee verstrooide lummels se patetiese roetine om ver gooi. ’n Misterieuse karakter, Tom (Tim Theron), stap die wassery binne om sy leerbaadjie te laat was. Wim besluit om die einste cool baadjie vir die aand na ’n partytjie te dra en dan ondek die twee ’n afgekapte vinger in die baadjie se sak… dis hier waar Kevin en Wim in ’n wêreld van moord, korrupsie en ondergrondse mafia base verstrengel raak…met skreeusnaakse gevolge!

Vuilwasgoed kon nie op ’n beter tyd gekom het nie. Die afgelope ruk het Afrikaanse komedies as’tware weer ’n laagtepunt begin beleef, na ’n eens lang opwindende tydperk met suksesvolle komedies soos Hollywood in My Huis en Vir die Voëls. Gehore het begin verveeld raak met dieselfde “slapstick” invalshoek of eenvoudig té skoon humor wat ongemaklik en gebrekkig voorkom, soos in die geval van Kampterrein en Hoender met die Rooi Skoene.

Bennie Fourie wat sedertdien sy skryftalent in kykNET-reekse, soos Hotel en Phil 101, bewys het, en Bouwer Bosch, met sy spyker-op-die-kop komiese tydsberekening, is ’n wenkombinasie. Hierdie twee saam as Wim en Kevin stel definitief nie teleur nie. Met kraakvars dialoog wat nie skroom om vloekwoorde realisties te gebruik nie (nie net vir skok nie), aksietonele wat jou sal laat vasklou aan jou sitplek en redigering deur die talentvolle Quinn Lubbe (wat die prys vir Beste Redigering by die 2017 Silwerskermfees gewen het) en ’n rolverdeling uit die boonste rakke, beloof Vuilwasgoed om meer as net jou lagspiere te kielie.

Bruto(ZAR)

Skerms

Kommentaar

kommentaar

Bitnami