Meerkat Maantuig

Jou wêreld is so groot soos jou verbeelding.

Daar is ’n vloek teen die naam “Gideon de la Rey”. Elkeen in die familie met daardie naam skop die emmer in ’n fratsongeluk op ’n relatiewe jong ouderdom. En nou is die 13-jarige Gideonette volgende aan die beurt, na haar pa se skielike en tragiese sterfte. Maar is daar ʼn kans dat die vloek heeltemal op sy kop gekeer kan word, as Gideonette haar vrese reguit in die oë staar en ’n tikkie verbeelding gebruik?

Meerkat Maantuig, losweg gegrond op Riana Scheepers se tienernovella, Blinde Sambok, gebruik magiese realisme om die gehoor mee te sleur op Gideonette se ontdekkingsreis na buite én na binne. Die kyker word ’n metgesel op hierdie 90-minute reis en kry ook die geleentheid om selfondersoek in te stel. Wat is daardie vrese wat jou terughou om jou te lewe te geniet? En hoe kan jy met wilskrag vorentoe beur en die struikelblokke oorkom?

Alhoewel kinders en tieners seker die hoofteikengehoor is, is ek doodseker dat elke grootmens ook iets uit hierdie rolprent sal neem, veral as gevolg van die onderliggende donkerder temas. Dit is verseker nie net nóg ’n Afrikaanse jeugfliek nie! Draaiboekskrywer en regisseur, Hanneke Schutte, skep ’n kunstige towerverhaal uit Scheepers se storie (wat terloops self grepe uit Scheepers se werklike jongmeisielewe bevat). Die internasionale erkenning en speelkans wat Meerkat Maantuig alreeds verower het, spreek ook boekdele oor die kreatiewe besluite wat Schutte met dié fliek gemaak het.

Schutte gaan slim te werk met haar jonger spelers om dié storie te vertel. Anchen du Plessis as Gideonette, wat ook in 2017 in Vaselinetjie te sien was, pas soos ’n handskoen by haar karakter. Sy speel die onderliggende naïwiteit, sowel as die vreesbevange oomblikke, skynbaar moeiteloos. Themba Ntuli as Bhubesi, word die groot dryfveë van die aksie op die skerm. Die karakter van Bhubesi is doof en hy gebruik slegs sy gesig en klein geluidjies om ’n band met Gideonette te vorm. Ntuli vertolk sy uitdagende rol oortuigend en gaan sonder twyfel harte laat smelt.

Alhoewel dit eerder Bhubesi behoort te wees wat homself oor sy toekoms bekommer, is dit Gideonette wat met hierdie vrese worstel. Maar stadig en seker wen Bhubesi haar vertroue en leer hy haar om haar greep op die leisels van haar lewe te verstewig. Hierdie twee karakters se verhouding speel gemaklik en oortuigend op die grootskerm af en dis net die hand van ’n uitmuntende regisseur wat sulke wisselwerkings kan regkry.